Ayiti bèl fanm/Haiti, beautiful woman

5 02 2011

Ayiti bèl fanm dore

Ayiti dyòl awoze

Ayiti peyi solèy

Ayiti peyi mèvèy

Ayiti bèl kou lakansyèl

Ayiti dous kou siwomyèl

Ayiti bèl fanm bèl fès

Ayiti peyi richès

Se tout sa n’ te konn ap di nan tan lontan

Lè potko gen souse k tap souse detanzantan

Kounye a Ayiti tankou yon piwouli

Chak moun ki pase fan ti souse

Li tankou yon telefòn lari

Chak moun ki pase fan ti pale

Epi vire do yo ale

San yo pa menm vire gade

Klòch la sonnen lè a rive pou nou pran konsyans

Pou n sispann pale vire pawòl ki pa gen sans

Sin pa fè inyon pap gen Inite

Sitout ban Nou Bouke

An poze andan Kay Pèp la, pou fè yon Chèn Solidarite

Menm si w te djed, ou byen Tèt Kale

Pou n ka Renmen Ayiti tout ban vre

Pou peyi a ka Kristalize

Se nou tout ki pou leve kanpe.

— DUPALIS Nathan





Lanmou se chen/Love is a dog

23 01 2011

Kounya l’ te la lale

Nan yon bat je

San di eskize

Ni di kote lale

Lanmou se chen.

 

Yon fanm ke m pat ka posede

Dèyè l’ m te konn ap mache

Tankou ti chen ki bezwen tete

Kounya men l’ nan bra m map souke

Lanmou se chen.

 

Pou sa manman m’ fè papa mwen

Bal’ zoklo avèk tout vwazen

Epi ki toujou kanpe sou zen

Gade yo kap kare nan yon kwen

Lanmou se chen.

 

Tankou madanm marye ap bay zoklo

Mouche marye vin pi damou

Ti jèn jan menm fin awoyo

Yap pran plezi yo toulèjou

Lanmou se chen.

 

Amplwaye renmen madanm patwon

Ti bòn menm tombe damou patwon

De bon zanmi renmen yon sèl fi

Fi deside di toulede wi

Lanmou se chen.

 

Cheri ou te mèt ale byen lwen

Yon kote ke m pa janm konnen

Vle pa vle wap retounen

Paske

Lanmou se chen.

DUPALIS Nathan